अमरावती पदवीधर निवडणूक:२३ उमेदवारांचे भाग्याचा फैसला ४ फेब्रुवारीला
-जिल्ह्यात सर्वाधिक कमी मतदान
अमन कठाणे
अमरावती : विधानपरिषदेच्या अमरावती विभाग पदवीधर मतदारसंघासाठी सोमवारी मतदान पार पडले. या मतदानासोबतच सर्व २३ उमेदवारांचे भाग्य मतपेटीत बंद झाले. निवडणूक ही पसंतीक्रमावर आधारित असल्याने यामध्ये ‘इव्हीएम’चा वापर करण्यात आला नाही. मतमोजणी गुरुवारी, २ फेब्रुवारी रोजी नेमाणी इन येथे केली जाईल. दरम्यान, पदवीधर मतदार असूनही मतदानाचा टक्का घसरल्याने सत्ताधारी भाजप तसेच सर्वच उमेदवारांची धाकधूक वाढली आहे. दुपारी २ वाजेपर्यंत केवळ ३०.४० टक्के मतदान झाले. उरलेल्या दोन तासानंतर हा आकडा २० टक्क्यांनी वाढून ४९.६७ वर स्थिरावला.
पदवीधर मतदारसंघासाठी सोमवारी अमरावती शहरातील एका मतदान केंद्रात सुरू असलेली मतदानाची प्रक्रिया. गेल्यावेळी झाले ६३.५२% मतदान सहा वर्षांपूर्वी २०१७ मध्ये पार पडलेल्या निवडणुकीत ६३.५२ टक्के मतदारांनी मतदानाचा हक्क बजावला होता. त्यावेळी ९५ हजार ७९४ पुरुष व ३७ हजार ९२० महिला मिळून १ लाख ३३ हजार ७१४ मतदारांनी मतदान केले होते. २६८ टपाली मतपत्रिकांचा वापरही त्यावेळी करण्यात आला होता. ३४ दिव्यांगांनी इतरांचे सहाय्य घेऊन मतदान केले होते. आश्चर्यजनक बाब अशी की तब्बल १० हजार १५४ मतपत्रिका अवैध ठरल्या होत्या.
नोंदणी केली, पण मतदान कुठाय ? सध्यस्थितीत या मतदारसंघाचे प्रतिनिधित्व माजी गृहराज्यमंत्री भाजपचे डॉ. रणजित पाटील करीत आहेत. गेल्या दोन्ही निवडणुका सलग त्यांनीच जिंकल्या. यावेळीही फार पूर्वीपासून तयारी सुरु करत त्यांच्या पक्षाने सर्वाधिक मतदार नोंदणी केली. परंतु नोंदविलेल्या त्या मतदारांना थेट मतदानाला पोहोचवण्यात मात्र त्यांना यश आले नाही. हीच स्थिती इतर पक्ष-अपक्ष उमेदवारांचीही झाली आहे.
