अडसूळ यांनी पत्ते खोलले : नवनीत राणांना जागा सोडण्यासाठी हे होते कारण

अडसूळ यांनी पत्ते खोलले : नवनीत राणांना जागा सोडण्यासाठी हे होते कारण

-दिल्लीतून आला होता या नेत्याचा फोन

प्रतिनिधी
अमरावती : शिवसेना शिंदे गटाचे नेते आणि माजी खासदार आनंदराव अडसूळ यांनी लोकसभा निवडणुकीत अमरावती लोकसभेत निवडणूक लढविण्यासाठी पक्षावर दबाव टाकण्याचा प्रयत्न केला होता. नवनीत राणा यांना उमेदवारी मिळू नये, यासाठी त्यांनी रणशिंग फुंकले होते. मात्र भाजपाने नवनीत राणा यांना प्रवेश देऊन उमेदवारी जाहीर केली. दरम्यान आनंदराव अडसूळ यांचाही विरोध मावळला. उमेदवारीच्या स्पर्धेतून माघार का घेतली? याचे उत्तर आता अडसूळ यांनी दिले आहे. केंद्रीय गृहमंत्री अमित शाहांनी फोन करून आपल्याला शब्द दिल्याचे त्यांनी सांगितले.

आनंदराव अडसूळ म्हणाले की, जागावाटपाची चर्चा सुरू असताना अमित शाह यांनी मला फोन केला होता. त्यांनी मला अमरावतीमधून निवडणूक लढवू नये, असे सांगितले. पण भाजपा जो उमेदवार देऊ इच्छितात त्यांचे निवडून येणे कठीण आहे. तसेच त्यांच्याविरोधात खटला प्रलंबित आहे, असे शाह यांना सांगितले. त्यावर ते म्हणाले की, आम्ही त्याची काळजी घेऊ. त्यानंतर त्यांनी मला राज्यपाल पद देण्यात येईल, अशी ऑफर दिली.