लोकसभेत मविआला 40 जागा मिळतील

आज मातोश्रीवर उद्धव ठाकरे यांनी भाजपचे मालेगावातील नेते अद्वेय हिरे यांना शिवबंधन बांधले. अद्वेय हिरेंचा ठाकरे गटात प्रवेश केल्यानंतर उद्धव ठाकरे बोलत होते.

उद्धव ठाकरे म्हणाले, आम्ही पंचवीस तीस वर्षे भोगले. आम्ही त्यांनासुद्धा पालखीत बसवून मिरवणुका काढल्या. पण त्यांना वाटले की, आम्ही कायमचे भोई आहोत. पण आम्ही त्यांना सांगतोय की, आम्ही भाजपची नव्हे तर हिंदुत्वाची पालखी वाहण्यासाठी आहे.

उद्धव ठाकरे म्हणाले, भाजपकडून किळसवाणा प्रकार सुरू आहे. युवकांना वाटते की, राजकारण एवढे घाणेरडे आहे का? मी म्हणतो की, राजकारण वाईट नसते, घाणेरडे नसते. त्या क्षेत्रातील वाईट माणसे राजकारण कसे आहे हे ठरवतात. भाजपने पाडलेला असा पायंडा गाडून टाकावे लागेल. हिरे कुटंबांशी ठाकरे कुटुंबासोबत स्नेहाचे संबंध आहेत. आमच्या पुढील पिढीची वाटचाल सुरू झाली आहे. केवळ मालेगावपुरते नव्हे तर अद्वेय यांना उत्तर महाराष्ट्राचे काम करावे लागणार आहे.

उद्धव ठाकरे म्हणाले, महाराष्ट्रातील लोक निवडणुकीची वाट बघत आहेत. महिनाभरात मालेगावला सभा घेऊ. मोकळ्या मैदानात बोलूया. आता निवडणुका झाल्या तर सर्वे सांगतोय की, मविआला 34 जागा मिळतील पण मी म्हणतो की आपण घट्ट राहिलो तर लोकसभेच्या 40 जागा मविआला मिळतील अशी आशा आहे. जनतेने त्रिफळाच उडवायचे ठरवले तर 48 जागाही शिवसेनेला मिळतील.

द्वेय हिरे म्हणाले की, गोपीनाथ मुंडेंनी मला विनंती केली आणि भाजपचे लोकसभेचे सीट निवडून देण्याचे आवाहन केले होते. मी नऊ वर्षांपासून भाजपमध्ये होतो. माझ्या तालुक्यात भाजपचे अस्तित्व नव्हते. तेव्हा मी भाजपला तालुक्यात बळ दिले पण अचानक पन्नास गद्दार भाजपच्या मांडीवर बसले त्यामुळे भाजपला आमची गरज उरली नाही.

–मी भाजपचा त्याग केला

अद्वेय हिरे म्हणाले, मी पदासाठी मागणी केली नव्हती. तालुक्यातील शेतकऱ्यांना आत्महत्याची वेळ आली. आम्ही जनआंदोलन केले पण त्यांनी शेतकऱ्यांना वाचवू शकले नाहीत. त्यामुळे मी भाजपचा त्याग केला. आम्ही शिवसेनेत त्यामुळेच सहभागी होत आहोत. भाजपला काल माझी आठवण आली.

– मुख्यमंत्रीपदी शिवसेनेचा नेताच बसवू

अद्वेय हिरे म्हणाले, कालपासून मला फोन येत होते, आजही येत नाही. पण मी खोके घेण्यासाठी आलो नाही. बाप बदलणाऱ्या औलादीपैकी मी नाही. महाराष्ट्रातील मुख्यमंत्रीपदी शिवसेनेचा नेताच बसवू. अजून 49 मतदारसंघातील नेते थांबले आहेत त्यांची कुचंबना होत असून ते शिवसेनेत येताना आगामी काळात दिसतील. गद्दारांना जनता धडा शिकवतील. भाजपमध्ये व्यक्तीस्वातंत्र्य नाही. काळीटोपी जे सांगते तेच आम्हाला बोलावे लागते. भाजपमध्ये सर्व स्क्रिप्टेड असते. फक्त बळी कुणाचा घ्यायचा हे स्क्रिप्टेड नसते. संजय राऊत म्हणाले, संयुक्त महाराष्ट्रात भाऊसाहेब हिरे यांची भूमिका महत्वाची होती. कठोर भूमिका मांडणाऱ्यांत ते होते. त्यांचेच वारसदार अद्वेय हिरे हे आता शिवसेनेत प्रवेश करीत आहेत. शिवसेना एक परिवार आहे. कुटुंबप्रमुख उद्धव ठाकरे आहेत. हिरेंमुळे शिवसेनेला नेतृत्व मिळेल. शिवसेना दोन पाऊले पुढे जाईल. शिवसेनेला बळ मिळुन उत्तर महाराष्ट्रात शिवसेनेला बळ मिळेल. शिवसेना संकटात असताना आपण प्रवेश केला याला महत्व आहे.

-हे आहेत अद्वय हिरे ?

माजी मंत्री भाऊसाहेब हिरे यांचे अद्वय हिरे हे पूत्र आहेत. त्यांनी यापूर्वी लढवलेल्या निवडणुकीत त्यांना पराभव पत्करावा लागला होता. त्यांनी शेतकऱ्यांसाठी आंदोलनही केले होते. त्यानंतर त्यांनी आता शिवसेनेत प्रवेश केला.