शिवसेना, धनुष्यबाण ; 2 हजार कोटी रुपयांचा सौदा
– संजय राऊत यांचा घणाघात
प्रतिनिधी
मुंबई : निवडणूक आयोगाच्या निर्णयानंतर आरोप प्रत्यारोप होत असताना संजय राऊतांनी गंभीर आरोप केला आहे. शिवसेना आणि धनुष्यबाण चिन्ह हिसकवण्यासाठी 2 हजार कोटी रुपयांचा सौदा झाल्याची प्राथमिक माहिती असल्याचे संजय राऊत म्हणाले. काल (18 फेब्रुवारी) उद्धव ठाकरेंनी ‘मातोश्री’ बाहेर येऊन शिवसैनिकांना संबोधन केल्यानंतर आज संजय राऊत यांनी पत्रकार परिषदेत हा गौप्यस्फोट केला.
पत्रकार परिषदेत संजय राऊत म्हणाले, ज्या पद्धतीने शिवसेना आणि शिवसेनेचे चिन्ह आमच्याकडून हिसकावून घेण्यात आले तो न्याय नाही, सत्य नाही, असे मी ट्विट करून देशाला कळवले आहे. हा व्यवहाराचा व्यवसाय झाला आहे. तो विकत घेतला गेला आहे. या प्रकरणात आतापर्यंत 2 हजार कोटी रुपयांचा व्यवहार झाला आहे. शिवसेनेचे नाव आणि चिन्ह हिसकावण्यासाठी 2000 कोटी रुपये खर्च झाले, ही माझी प्राथमिक माहिती आहे. हा निवाडा विकत घेतला आहे.
-अंदाज तुम्ही लावू शकता
संजय राऊत म्हणाले, सहा महिन्यांत 2 हजार कोटी रुपयांचे व्यवहार झाले आहेत. बेईमान लोकांचा एक गट आमदार खरेदीसाठी 50 कोटी, खासदार खरेदी करण्यासाठी 100 कोटी, नगरसेवक खरेदी करण्यासाठी 1 कोटी आणि शाखाप्रमुख घेण्यासाठी 50 लाख खर्च करू शकतो. पक्षाचे नाव आणि लक्ष्य मिळविण्यासाठी तो किती बोली लावू शकतो, याचा अंदाज तुम्ही लावू शकता. माझा अंदाज आहे की आतापर्यंत 2000 कोटी रुपये खर्च झाले आहेत. मी या दाव्यावर ठाम आहे.
-2 हजार कोटी उडविण्यात आले
संजय राऊत म्हणाले, भारतीय जनता पक्षाला वाटलं तर उद्या ते मुंबई आणि महाराष्ट्रही विकत घेतील. आतापर्यंत चिन्ह आणि नाव 2 हजार कोटी उडवण्यात आले आहेत. यापुढे अनेक गोष्टी विकत घेण्यासाठी प्रयत्न होतील. 2 हजार कोटी ही रक्कम लहान नाही. चार अक्षरांचं शिवसेना हे नाव आणि धनुष्यबाण हे चिन्ह मिळण्यासाठी हे डील झालं आहे. मी ट्विट करून देशाला ही माहिती दिली आहे. आमच्याकडून आमचं नाव आणि चिन्ह हिसकावण्यात आलं आहे त्यासाठी हे एवढं मोठं डील झालं आहे. काही बिल्डरांनी मला ही माहिती दिली आहे त्याचे पुरावे आम्ही लवकरच देऊ.
