माजी पर्यटन मंत्र्यांनी घेतला शिवसेनेच्या बड्या नेत्याचा समाचार
-राज्याचं राजकारण यांनी गढूळ केल्याचा आरोप
प्रतिनिधी
पुणे : मुख्यमंत्री आमचं ऐकत नाही, राज्याचं ऐकत नाहीत, महाराष्ट्राचा ऐकत नाहीत, ते फक्त गुजरातचे ऐकतात. हे सरकार पडणार म्हणजे पडणार आणि आपलं सरकार नक्की बसणार. ज्या अधिकाऱ्यांनी, मंत्र्यांनी आणि मुख्यमंत्र्यांनी या महाराष्ट्राला गुजरातच्या आदेशावरून लुटलं त्या सर्वांना जेलमध्ये टाकू, असा इशाराच माजी पर्यटन मंत्री आदित्य ठाकरे यांनी दिला आहे. या लोकांनी राज्याचं राजकारण यांनी गढूळ केलं आहे. राष्ट्रवादीसोबत जायची वेळ आली तर संन्यास घेऊ म्हणणारे लोकं आज राष्ट्रवादीसोबत बसले आहेत. संन्यास घेणार होते त्याचं काय झालं? असा सवालही आदित्य ठाकरे यांनी केला.
माजी पर्यटन मंत्री आदित्य ठाकरे आज पुण्यात होते. यावेळी एका सभेला संबोधित करताना त्यांनी शिंदे सरकारवर जोरदार हल्ला चढवला. अवकाळी पावसासारखं अवकाळी सरकार आपल्या डोक्यावर बसलं आहे. पुण्यात येणारी वेदांता कंपनी या सरकारने घालवली. ही कंपनी पुण्यात राहावी म्हणून आम्ही शेवटपर्यंत प्रयत्न केला. ही कंपनी राज्यात राहिली असती तर मोठा रोजगार आपल्याला मिळाला असता. पण सरकार बदलून खोके सरकार आलं आणि ही कंपनी गुजरातला गेली. या सरकारने त्या कंपनीला गुजरातला जायला भाग पाडलं. नागपूरमध्ये येणारी एअर बस कंपनी गुजरातमध्ये पाठवली. संभाजी नगरमध्ये येणारा उद्योग गुजरातला पाठवला. एकूण ५ कंपन्यासह फिल्म फेअर अवॉर्ड देखील गुजरातला नेला, असा हल्लाच आदित्य ठाकरे यांनी चढवला.
गुजरातला वर्ल्ड कप नेला आणि आपण हरलो. जर तुम्ही वानखेडेवर अंतिम सामना खेळवला असता तर आपण जिंकलो असतो. मागच्या वर्षी २ दिवसात दावोसमध्ये ४० कोटी रुपये खर्च झाले. आता ५० लोक घेऊन गेले. मुख्यमंत्र्यांना ५० हा आकडा खूपच आवडतो, असा टोला लगावतानाच दावोसमध्ये जाऊन त्यांनी मज्जा केली. तुम्ही राज्यासाठी काय आणलं ते सांगा, असं आव्हानच आदित्य ठाकरे यांनी दिलं.
