अमरावतीत काय चाललंय; अपक्ष उमेदवारावर अज्ञाताचा हल्ला
-दोन दिवसात पाठिंबा न दिल्यास जीवे मारू
प्रतिनिधी
अमरावती : अमरावती पदवीधर निवडणुकीची रणधुमाळी सुरू झाली असून ३० जानेवारीला मतदान होणार आहे. दरम्यान, याच निवडणुकीत अपक्ष उमेदवार असलेले विकेश गवाले यांच्यावर सोमवारी (दि. २३) मोर्शी मार्गावरील माहुली जहागिरच्या पुढे अज्ञात चौघांनी हल्ला केला. दोन दिवसात पाठींबा न दिल्यास जीवे मारु, अशी धमकीही यावेळी हल्लेखोरांनी दिली. मात्र पाठींबा नेमका कोणाला द्यायचा याबाबत हल्लेखोरांनी सांगितले नसल्याचे गवाले यांनी सांगितले आहे. विकेश गोकुलराव गवाले (३२, रा. वृंदावन अपार्टमेंट, रहाटगाव, अमरावती) यांनी सांगितल्याप्रमाणे, सोमवारी सकाळी प्रचारासाठी मोर्शी भागात कारने एकटाच जात होतो. त्यावेळी माहुली जहागिरपासून एक किलोमीटर अंतर पुढे गेल्यानंतर मला हात दाखवून थांबवण्यात आले. त्यावेळी मला वाटले आपले परिचितच कोणी आहे, म्हणून मी कार थांबवून कारमधून खाली उतरलो. खाली उतरताच चौघांपैकी एकाने मला छातीवर बुक्की मारली.
त्यानंतर अन्य तिघांनी सुध्दा हाता-पायावर मारहाण केली. हल्लेखोरांकडे चाकू सुध्दा होता, चाकूने सुध्दा वार केला. तसेच त्यांनी धमकी दिली की, दोन दिवसांत पाठींबा न दिल्यास जीवे मारुन टाकू, मात्र कोणाला पाठींबा द्यायचा हे त्यांनी सांगितले नाही. मात्र आपण कोणालाही घाबरणार नसून मागे येणार नाही, निवडणूक लढवणारच, असे गवाले यांनी ‘दिव्य मराठी’ला सांगितले आहे. दरम्यान, गवाले यांनी या प्रकरणाची माहुली पोलिसांत तक्रार दिली असून पोलिसांनी अज्ञात हल्लेखोराविरुध्द गुन्हा दाखल केला आहे. गवाले यांच्यावर पाठींबा देण्यासाठी कोणी हल्ला केला. हल्लेखोरांनी पाठींबा कोणाला द्यायचा ते का सांगितले नाही, असे अनेक प्रश्न पोलिसांसमोर उभे झाले असून पोलिसांनी आरोपी पकडल्यानंतरच या बाबींचा उलगडा होणार आहे.
