- कुणी ठणकाविले मोदी सरकारला, तुम्ही कारवाई न केल्यास आम्ही करू
– मणिपूर येथे दोन महिलांची नग्न अवस्थेत धिंड
प्रतिनिधी
नवी दिल्ली : मणिपूरमध्ये जमावाने दोन महिलांची नग्न अवस्थेत रस्त्यावरुन धिंड काढल्याचा प्रकार बुधवारी समोर आला. राजधानी इंफाळपासून 35 किमी अंतरावर असलेल्या कांगपोकपी जिल्ह्यात 4 मे रोजी ही घटना घडली. त्याचा व्हिडिओ बुधवारी सोशल मीडियावर व्हायरल झाला. यावर सुप्रीम कोर्टाने म्हटले आहे की, व्हिडिओ पाहून आम्ही खूप अस्वस्थ झालो आहोत. आम्ही सरकारला यावर पावले उचलण्यासाठी वेळ देत आहोत. त्यांनी काही केले नाही तर आम्हाला पावले उचलावी लागतील. त्याचवेळी पीएम मोदी म्हणाले की, या घटनेने 140 कोटी भारतीयांना मान खाली गेली आहे. या प्रकरणातील गुन्हेगाराला सोडले जाणार नाही.
मणिपूर पोलिसांनी या प्रकरणी अपहरण, सामूहिक बलात्कार आणि हत्येचा गुन्हा दाखल करून दुपारी एका आरोपीला अटक केली होती. तर सायंकाळपर्यंत आणखी एका आरोपीला अटक करण्यात आली. इतरांचा शोध सुरू आहे. सर्व आरोपींना फाशीची शिक्षा व्हावी यासाठी आम्ही शक्य ते सर्व प्रयत्न करू, असे मणिपूरचे मुख्यमंत्री एन बिरेन सिंग यांनी म्हटले आहे.
सर्वोच्च न्यायालय म्हणाले, हा संविधानाचा सर्वात घृणास्पद अपमान
गुन्हेगारांवर कारवाई करण्यासाठी तुम्ही काय पावले उचलली आहेत, असा सवाल सर्वोच्च न्यायालयाने केंद्र आणि मणिपूर सरकारला केला आहे. CJI म्हणाले की, जातीय संघर्षाच्या काळात महिलांचा एक साधन म्हणून वापर करणे मान्य केले जाऊ शकत नाही. हा संविधानाचा अत्यंत घृणास्पद अपमान आहे. याप्रकरणी पुढील सुनावणी शुक्रवारी होणार आहे.
–पंतप्रधान म्हणाले, माझे हृदय रागाने भरले आहे
पीएम मोदी म्हणाले, ‘आज माझे हृदय वेदनांनी भरले आहे, रागाने भरले आहे. मणिपूरची घटना ही कोणत्याही सुसंस्कृत समाजासाठी लाजिरवाणी घटना आहे. पाप करणारे कोण आहेत आणि किती आहेत हे बाजूला राहू द्या.
ते म्हणाले, ‘हा अपमान संपूर्ण देशाचा आहे. 140 कोटी भारतीयांसाठी लाजिरवाणे आहे. मी सर्व मुख्यमंत्र्यांना कायदा आणि सुव्यवस्था मजबूत करण्यास सांगतो. माता-भगिनींच्या सुरक्षेसाठी कठोर पावले उचला.
पंतप्रधान म्हणाले की, या देशात, भारताच्या कोणत्याही कानाकोपऱ्यात किंवा कोणत्याही राज्य सरकारमध्ये, राजकीय वाद-विवादाच्या वर उठून कायदा आणि सुव्यवस्था आणि बहिणींचा सन्मान यांना प्राधान्य आहे. कोणत्याही गुन्हेगाराला सोडले जाणार नाही. मणिपूरच्या मुलींचे जे झाले ते कधीही माफ केले जाऊ शकत नाही.
वास्तविक, मणिपूरमध्ये कुकी समाजाच्या दोन महिलांना विवस्त्र करून जमावाने रस्त्यावर धिंड काढली होतरी. ही बाब 4 मेची आहे. राजधानी इंफाळपासून 35 किमी अंतरावर असलेल्या कांगपोकपी जिल्ह्यात ही घटना घडली. त्याचा व्हिडिओ बुधवारी सोशल मीडियावर व्हायरल झाला. राज्यात अडीच महिन्यांहून अधिक काळ हिंसाचार सुरू आहे.
