हिंडेनबर्गची डोकेदुखी; अदानी समुहाच्या अडचणीत वाढ
– अनेक दशकांपासून स्टॉकची हेराफेरी
प्रतिनिधी
नवी दिल्ली: अमेरिकेतील रिसर्च फर्म हिंडेनबर्ग रिसर्चच्या अदानी समुहावरील गैरव्यवहाराच्या अहवालामुळे सध्या शेअर बाजार आणि देशभरात खळबळ उडाली आहे. गेल्या बुधवारी समोर आलेल्या अहवालात अदानी समूह अनेक दशकांपासून स्टॉकची हेराफेरी आणि खात्यातील फसवणुकीत गुंतला असल्याचा दावा करण्यात आला. त्यामुळे बुधवार आणि शुक्रवारी अदानी समूहाचे शेअर्स झरझर खाली घातले. दुसरीकडे, आज आठवड्याच्या पहिल्या व्यवसाय सत्रात समूहाच्या शेअर्समध्ये संमिश्र कल पाहायला मिळत आहे.
अदानी समूहाने हिंडेनबर्गच्या अहवालावर रविवारी ४१३ पानांचे उत्तर दिले, ज्यावर आज अमेरिकन कंपनीने प्रतिक्रिया देत “राष्ट्रवादाचा मुखवटा घालून फसवणूक टाळता येणार नाही. अदानी समूहाने खऱ्या मुद्द्यांवरून लक्ष हटवण्याचा प्रयत्न केला. आरोपांना उत्तर देण्याऐवजी अदानी समूह राष्ट्रवादाचा अवलंब करत आहे, असे त्यांनी म्हटले आहे. हिंडेनबर्गने आपल्या नवीन पोस्टमध्ये म्हटले की, “आम्ही मानतो की भारत एक व्हायब्रन्ट लोकशाही आहे आणि एक महासत्ता म्हणून उदयास येत आहे. अदानी समूह भारताच्या भविष्याशी खेळत आहे, असा आमचा विश्वास आहे. हा समूह राष्ट्रवादाच्या नावाखाली देशाची लूट करत आहेत.
-हिंडेनबर्गचे ८८ प्रश्न…
मागील आठवड्यात आपला अहवाल प्रकाशित करत अमेरिकन फर्मने अदानी समूहावर गंभीर आरोप केले. याबाबत त्यांनी अदानी समूहाला ८८ प्रश्न विचारले होते त्यापैकी ६२ प्रश्नांची उत्तरे अजूनही दिली नाही. यापैकी बरेच प्रश्न व्यवहारांचे स्वरूप आणि हितसंबंधांच्या संघर्षांबद्दल विचारले गेले. मात्र अदानी समूहाने त्यांना कोणतेही उत्तर दिले नाही. म्हणजेच अदानी समूहाने या अहवालाला एक प्रकारे दुजोरा दिला आहे, असे सांगितले.
– काय आहे अदानी समूहाचे स्पष्टीकरण ?
हिंडेनबर्गच्या आरोपांवर प्रतिक्रिया देत अदानी समूहाने रविवारी स्पष्टीकरण दिले. भारत आणि आशियातील सर्वात श्रीमंत गौतम अदानी यांच्या नेतृत्वातील समूहाने हिंडेनबर्गच्या आरोपांवर ४१३ पानांचा प्रतिसाद दिला. हिंडेनबर्गचे आरोप भारतावरील हल्ला असे त्यांनी वर्णन केले. २४ जानेवारी रोजी ‘मॅडऑफ्स ऑफ मॅनहॅटन’ वरील हिंडेनबर्ग संशोधन अहवाल वाचून धक्का बसल्याचे या समूहाने म्हटले. हा अहवाल खोटा असून यामध्ये विशिष्ट हेतूने समूहाची बदनामी करण्यासाठी बिनबुडाचे आरोप करण्यात आल्याचे अदानी ग्रुपने म्हटले. उल्लेखनीय आहे की या अहवालामुळे अदानी समूहाच्या कंपन्यांचे शेअर्स आपटले.
