आसामच्या मुख्यमंत्र्यांना काय झाले ?
महिलांना दिला योग्यवेळी आई होण्याचा सल्ला
प्रतिनिधी
आसाम : आसामचे मुख्यमंत्री हिमंता बिस्वा सरमा यांनी महिलांना योग्य वयात आई होण्याचा सल्ला दिला आहे. आई होण्याचे योग्य वय 22 ते 30 वर्षे आहे. यासाठी महिलांनी जास्त वेळ थांबू नये. जर त्यांनी 30 नंतर मुलाला जन्म दिला तर अनेक वैद्यकीय अडचणी येतात, असे ते म्हणाले.
शनिवारी गुवाहाटी येथे एका सरकारी कार्यक्रमात मुख्यमंत्र्यांनी ही माहिती दिली. ते बालविवाह आणि महिलांशी संबंधित समस्यांवर लोकांना संबोधित करत होते.
सीएम सरमा म्हणाले की, ज्या महिलांनी अद्याप लग्न केले नाही. त्यांनी लवकर लग्न करावे. देवाने आपले शरीर अशा प्रकारे बनवले आहे की प्रत्येक गोष्ट एका विशिष्ट वयोमर्यादेत व्हायला हवी. ते पुढे म्हणाले की, कमी वयात लग्न न होणे आणि योग्य वयात मुले न होणे हे देखील माता व बालमृत्यू वाढण्याचे कारण आहे. म्हणूनच मी सर्व महिलांना 30 वर्षापूर्वी लग्न करण्याचा सल्ला देईन.
आसाम मंत्रिमंडळाने 14 वर्षांपेक्षा कमी वयाच्या मुलींशी विवाह करणाऱ्या पुरुषांवर पोस्को कायद्याअंतर्गत गुन्हा दाखल करण्याचा निर्णय घेतला आहे. 14 ते 18 वयोगटातील मुलींशी विवाह करणाऱ्यांवर बालविवाह प्रतिबंध कायदा 2006 अंतर्गत कारवाई केली जाईल. राज्यातील माता आणि बालमृत्यूच्या उच्च दराला आळा घालण्यासाठी हा निर्णय घेण्यात आल्याचे सरमा यांचे म्हणणे आहे. कारण, बालविवाह हे देखील यामागचे एक प्रमुख कारण आहे.
