हे प्रदेशाध्यक्ष ठरले अनोखे, नागपुरात आले अन…!
-यापूर्वीच्या अध्यक्षांपेक्षा वेगळी कार्यशैली
प्रतिनिधी
नागपूर : भारतीय जनता पक्षाचे प्रदेशाध्यक्ष रवींद्र चव्हाण याचा नुकताच झालेला नागपूर दौरा सध्या वेगळ्या अर्थाने चर्चेत आहे. त्यांनी एका कार्यक्रमाला हजेरी लावली, पक्ष कार्यकर्ते, पदाधिकारी, नेते यांच्या भेटी घेतल्या आणि परतही गेले. ते येणार याची पक्षाच्या पदाधिकाऱ्यांव्यतिरिक्त कोणाला नव्हती, माध्यमांनाही कळवण्यात आले नाही, त्यांनी स्वत:हून विचारलेल्या प्रश्नांनाही उत्तरे दिली नाहीत. एकणच सर्वकाही पूर्वीच्या भाजप परंपरेप्रमाणे. हे सर्व मागचे कारण चव्हाण यांची यापूर्वीच्या अध्यक्षांपेक्षा वेगळी असलेली कार्यशैली. गाजावाजा कमी आणि कामावर लक्ष्य हे त्यांच्या देहबोलीतून दिसून आले.
मुख्यमंत्री देवेंद्र फडणवीस यांच्या जन्मदिनाचे औचित्य साधून प्रदेश भाजपाने काही सामाजिक उपक्रम राबवण्याचा संकल्प केला होता. त्याला अनुसरूनच एक कार्यक्रम नागपूर भाजपने आयोजित केला होता. त्याच्या उद्घाटनाला प्रदेशाध्यक्ष रवींद्र चव्हाण नागपुरात आले होते. हा कार्यक्रम मुख्यमंत्री देवेंद्र फडणवीस यांच्या दक्षिण-पश्चिम मतदारसंघात होता. सकाळच्या विमानाने रवींद्र चव्हाण नागपुरात आले. मोजकेच कार्यकर्ते आणि पदाधिकारी त्यांना विमानतळावर स्वागतासाठी उपस्थित होते. त्यानंतर त्यांनी सामाजिक उपक्रमाचे उद्घाटन केले.
नंतर स्थानिक पदाधिकारी, नेत्यांशी चर्चा करून ते परत गेले. त्यांच्या दौऱ्याचा कुठेच गाजावाजा करण्यात आला नाही, माध्यमांनाही कळवण्यात आले नाही, त्यांनी पत्रकार परिषदही घेतली नाही. स्थानिक भाजप कार्यकर्त्यांसाठी हा बदल एकूणच धक्कादायक होता. यापूर्वीच्या अध्यक्षांचा कोणताही कार्यक्रम मिडीयाच्या उपस्थिती शिवाय होतच नसे. केलेल्या कामाचा प्रचार आणि प्रसार यात ते वाकबगार मानले जातात. कार्यक्रमस्थळी, विमानतळावर जाताना किंवा येताना त्यांचा इलेक्ट्रॉनिक माध्यमांशी संवाद ठरलेला. ही पार्श्वभूमी लक्षात घेता चव्हाण यांनी त्यांच्या दौऱ्यात या सर्व बाबींना फाटा देऊन वेगळेपण दाखवला.
